Mga Garay

Mga Garay

by Virgencito Iskulastiko Litik on Wednesday, September 7, 2011 at 4:41pm

Gabii sa Pagpanuh

Gi hapuhap sa mabugnawng huyohoy sa hangin ang akong tangkogo,
Samtang nag sud-ong ako sa mga gisaw nga gigukod sa mga nanubad nga bawo;
Nangalimyon ang kahumot sa Dagatnong hangin, nga maoy miuliot sa nagbuliskad kong ilong;
Naningkang ang bungot sa akong ilok sa dihang sa dunggan ko may hangin nga mihunghong.

Gitamparos ako sa akong nahigmata nga handurawan,
Sa dihang miambak ang kasag gikan sa iyang sudlanan;
Gihugtan ko pag gunit ang petromax og dala kung Sundang;
Kay didto sa unahan may kalit nabulintang, ang kuyog ko diay napandol natikangkang.

Lami nga kilawon ang isda og pasayan nga sa pagpanuh makuha;
Kay kini humot-humot, Tam-is tam-is, lami pa sa Humba;
Ang mga laway magtubod, magtilagak, mga luha magbanaw tungod sa kahalang sa suka;
Kini ang kalipay sa mga mugbo og kalipay, mga anak sa luha.

Iskulastiko Litik (aka.. Gene Lariosa)

Balak Na Sad

Balak Nasad

by Virgencito Iskulastiko Litik on Wednesday, September 7, 2011 at 2:18pm

HABAGAT

Nag  tuwang-tuwang  ang akong panan-aw samtang nagtungtong ko sa akong baroto;
Bawod nga nagsuag kay gisugkay sa hanging Habagat;
Dili unta ko mulusad kay nag alintabo ang tubig nalubog ang dagat;
Wala koy laing kapilian mao may sugo sa nagkutoy kung tiyan;
Ang pagpangita og sud-an aron matagbaw ang nagpamahit nga bitok sa akong ginhawaan.

Miambak ako dayon dala ang baling nga akong gamiton;
Ang pag panabay maoy kasagaran nakong buhaton;
Kung mo kolyada gani si Habagat mga isda usab magkatibuwaag, pasagad lag hamag;
Mao nga adto sila mopilit, sa panabay kung gigamit;

Lumot og lusay maoy nasangit sa sabay kung gi bitbit ;
Sa akong baling nga kabilin pa ni tatay Kulas, naputos sa lungag hapit na ma watas-watas;
Wala ko maglangay ako mipauli nalang, akong kuha Tangkig ra gyud ug usa ka buok Uwang,
Sakto rang gi tuwa og akong  gi larang…

Iskulastiko Litik (aka. Gene lariosa)

Panahum

Panahum

by Virgencito Iskulastiko Litik on Wednesday, September 7, 2011 at 6:44pm

Mga Panglantaw ni yotnej

Gidat-ul ang Liog sa tadtaran sa mga tanghaga aron kini tagudtaguron og huknayon,

Kini masabtan lang sa mga may igo og lapad, wanang, nga panabut, atong ablihan

Ang atong salabutan aron pasudlon ang nagkadaiyang panglantaw og baruganan.

Kung dili nimo dawaton ang mga negatibong pagsaway, unya imo hinuon kining supakon

Og dili paminawon, nahisama ka sa usa ka garapon nga ginamos nga hugot kaayong pagkatabon.

Gahi kaayong ablihan, diin ang sulod niini hilabihan na diayng pagkahuom, pwerting baklaga.

Sama kita sa usa ka komentarista sa kahanginan, tinuod ikaw ang nagdumala sa programa apan kinsa naman lang unyay maminaw nimo kung imong supakon ang imong mga tigpaminawan, matag usa nato

May kaugalingon bahig.. “Ang Pagpaminaw maoy sinugdanan sa panaghiusa.”

Iskulastiko Litik..